OM a manda investiga DNA den caso di asesinato Poentje Castro

Husticia tabata interesa den mensahenan ricibi e anochi di asesinato

Mi a skirbi e articulo aki pa Bon Dia Aruba. El a aparece riba e matutino riba 10 di maart 2021.

Despues di rond di 10 aña cu un investigacion den e asesinato di presentado y periodista John A. “Poentje” Castro no a duna ningun resultado, mi a haci un peticion pa documentonan (Wob) na Instituto Forensico Hulandes (NFI). Documentonan duna den cuadro di e peticion ta mustra cu banda di e BlackBerry di Castro manda pa Hulanda, tambe a manda material di DNA, algo cu husticia na Aruba nunca a yega di declara anteriormente. Alabes husticia tabatin interes den mensahenan cu Castro a ricibi 8 or e anochi cu el a wordo asesina.

Un anochi den bida di Poentje Castro, esta 22 di december 2010, e periodista y presentado famoso a wordo asesina den su cura di cas cu su BlackBerry 9700 den man, tras di su pickup, documentonan obteni di Nederlands Forensisch Instituut (NFI) ta indica. Casi inmediatamente despues cu su curpa a wordo haya e mainta despues, husticia a lanta un Team Grootschalig Optreden (TGO) pa purba haya e asesino. Ya riba 28 di december husticia (esta Cuerpo Policial hunto cu Ministerio Publico) a manda e BlackBerry cu e tabatin den su man na momento cu el a fayece na Hulanda pa investigacion tecnico y forensico.

Husticia tabata kier a haya acceso na e contenido di e BlackBerry di Castro, pues a pidi NFI pa desblokia e telefon, y si ta necesario, kibr’e pa haci esaki. Loke NFI a haci despues di a haya e BlackBerry di Castro riba 7 di januari 2011, ta decodifica emailnan y SMSnan cu tabatin riba e telefon di Castro y traha rapportnan a base di esaki.

NFI ta manda rapport cu CD na OM

Despues di loke ta mustra manera un eror di comunicacion pa loke ta paga e invoice di €6.380 pa haci e investigacion forensico, riba 31 di mei di 2011 NFI a manda resultado di e investigacion na husticia na Aruba. Maske a deliver e prome resultado preliminario den maart di 2011 y esun oficial den mei, pa via di eror di coordinacion of comunicacion, Ministerio Publico no a haya e invoice te november di 2011. Tambe ta resalta cu e fiscal a pidi pa manda e password pa e zip-file na su email personal riba hotmail.com. Riba 31 di mei 2011 NFI a manda e rapportnan oficial di e investigacion, hunto cu un CD cu tur adhunto cu ta bay cu e rapport.

Poco tempo despues, NFI a indica na e fiscal di e caso riba 12 di augustus 2011 cu nan tin un programa nobo cu lo por saca mas detaye di e BlackBerry 9700 di Castro. 3 dia despues, riba 15 di augustus 2011, e fiscal ta contesta cu e lo kier haya e informacion ey. Riba 9 di september NFI ta email e fiscal un bes mas, bisando cu tin resultadonan preliminario nobo. BlackBerry_9700_white_and_black.jpg

Fiscal ta pidi mensahenan di e anochi di e asesinato di Castro

E resultadonan ta indica cu e metodo nobo ta saca mas informacion afo, entre otro, 278 mensahenan di SMS cu por wordo lesa, 1510 email cu por wordo lesa, y otro informacion manera contactonan.

Esey ta diferencia na e metodo bieu pasobra e metodo bieu no tabata haci posibel pa lesa email ni mensahe. NFI ta indica cu mensahe di SMS #147 cu nan a haya, a wordo ricibi e anochi cu Castro a wordo asesina pa 8 or y 37 (20:37). Cu e metodo anterior, e datum tabata fout, pasobra el a mustra cu e mensahe a wordo manda 22 di december 2010 pa 10 di mainta. E fiscal ta bisa NFI via email riba 9 di september cu mas tanto nan lo ta interesa den e mensahenan di 23 di december (pues den ora di Aruba, e mensahenan di 22 di december).

Investigacion di DNA

Den e peticion di Wob cu mi a haci, un articulo di corant (nr. 27 riba e lista di documento duna) a wordo duna, unda ta mustra cu OM a manda mas material pa NFI investiga.

E informacion aki sinembargo no a aparece den NFI su buskeda, maske mi a pidi pa tur cos regardando e investigacion den cuadro di asesinato di Castro. Mi a tuma contacto cu NFI, y nan a splica cu pa via cu a busca uzando e number di caso cu e prome investigacion tabatin (riba e BlackBerry), no a haya e documentonan riba e otro investigacion, esta riba DNA cu OM a manda Hulanda. Esaki pasobra nan a boek e investigacion di DNA riba otro number di caso. NFI a duna disculpa y a indica cu ta buscando e resto di e documentonan cu no a wordo haya den cuadro di mi peticion.

Pronto lo bin mas documento di parti di Hulanda, pero turesten mi a entrega un peticion pa documentonan (Lob) na Ministerio di Husticia di Aruba pa asina haya tur documento, corespondencia, etc. den cuadro di e investigacion penal riba asesinato di Poentje Castro. Si Ministerio di Husticia (of Ministerio Publico) lo honra e peticion, al contrario na un peticion anterior cu e ministerio a ignora pa 1 aña y mei, lo mester mira ainda.

E documentonan cu mi anotacionnan ta disponibel riba mi DocumentCloud.

E documentonan cu NFI a publica despues cu mi a haci mi peticion ta disponibel tambe riba e site di Nederlands Forensisch Instituut. 1

  1. E peticion mes y e decision den cuadro di e decision tambe ta disponibel riba NFI su site.