Ministernan ta laga mita di tur pregunta sin contesta ultimo 3 aña

E grafiek na cabes di e post ta mustra cua porcentahe di e 815 preguntanan por escrito cu a keda sin contesta den 2019-2020 cada minister a contribui.

Mi a skirbi e articulo aki pa Bon Dia Aruba. El a aparece riba e matutino riba 1 di maart 2021.

E ultimo 3 aña, data di parlamento ta indica cu ministernan ta laga mita di tur pregunta di parlamentarionan haci por escrito sin contesta, 20 ley ta pasa pa aña, y parlamentarionan no ta uza nan derecho di iniciativa (pa cuminsa ley) hopi.

Cu colaboracion di miembro independiente den Parlamento di Aruba Daphne Lejuez mi a haya e resumennan di trabounan eherci pa parlamento den e ultimo 3 añanan parlamentario. Esaki ta trata e añanan 2017-2018, 2018-2019 y 2019-2020.

Preguntanan Habri ministerio 2018-2019.jpg

Averahe di 55% di pregunta por escrito laga sin contesta ultimo 3 aña

Loke prome ta sali afo di analisa e data, ta cu tin un falta di contestacion sistematico riba e preguntanan haci por escrito pa parlamentarionan. Di e total di 794 pregunta haci den 2017-2018, 444 ta keda sin contesta, cual ta nifica cu 55.9% di e preguntanan haci por escrito no ta haya ningun contesta. Pa e preguntanan di 2018-2019, di un total di 701, 364 ta wordo contesta, lagando 337 sin contesta. Esaki ta nifica cu den e aña aki 48% di e preguntanan total ta keda sin contesta. Pa e aña despues, no tin resultado mucho miho relativamente. Di e 1325 pregunta por escrito haci den 2019-2020, 815 ta keda sin contesta, cual ta un 61.5%.

Preguntanan Habri ministerio 2017-2018.jpg

E derecho di un parlamentario pa haci pregunta na un minister ta regla den constitucion di Aruba (Staatsregeling) articulo III.17. Den e articulo ta menciona cu e minister ta contesta e pregunta den un termino rasonabel. Reglamento di Ordo di Parlamento di Aruba ta establece mas den detaye con e contestacion aki mester tuma luga. A base di articulo 59 di e RVO, tur parlamentario por haci pregunta na ministernan, por medio di mandanan na presidente di parlamento, kende na su turno ta manda nan na e minister(nan) concerni. E presidente por laga di manda e preguntanan si tin un obhecion grandi contra nan contenido, y hasta den e caso ey, ta informa e parlamentario(nan) pakico.

Den e pregunta e parlamentario por indica si e ta prefera pa haya un contesta por escrito of verbalmente. Si e parlamentario ta scoge pa un contesta verbal, e minister ta haya oportunidad pa contesta den un ora di pregunta (vragenuur). Minimo 1 ora di pregunta ta wordo contesta pa aña. Tanto den 2017-2018 como den 2019-2020, tabatin solamente 1 vragenuur henter e aña, mientras den 2018-2019 tabatin 5.

E lo por ta posibel cu pa via cu ta pidi contesta verbal y solamente tin 1 of tiki vragenuur, tin un cantidad halto di preguntanan por escrito cu ta keda sin contesta. Esey sinembargo no por conclui di e informacion cu parlamento a publica, pasobra no a specifca si e preguntanan por escrito ta encera un peticion pa contesta verbalmente of por escrito.

Asina mes, si un parlamentario pidi pa contesta verbal y e minister no ta disponibel pa e vragenuur, e parlamentario por pidi un contesta por escrito of un contesta verbal den e proximo vragenuur, cual no ta trece mas claridad riba con parlamentarionan por ainda haya contesta pa nan preguntanan habri.

E documentonan riba cual e data aki ta basa ta disponibel den e coleccion aki:

Mas o menos 20 ley pasa cada aña

Banda di e aspecto di pregunta haci por escrito, unda ta resalta cu ministernan no ta contesta mita di tur preguntanan haci, ta mustra cu e ultimo 3 añanan a pasa mas o menos 20 ley cada aña. Ta casi como si fuera cu cada parlamentario individualmente ta carga 1 ley pa aña durante henter e proceso legislativo. Di e leynan aki, mayoria ta bin di parti di gobierno, y den ultimo 3 añanan (pues no contando 2020-2021 ainda) e unico leynan di iniciativa cu a bin di parlamentarionan mes, ta e ley di iniciativa pa financiamento di partido politico y e ley pa deber di identificacion (ambos iniciativa di fraccion di MEP). E ultimo 3 añanan parlamentarionan no a haci uzo casi di nan derecho di iniciativa.

No ta uza derecho di amienda mucho

Ta mustra ademas cu e ultimo 3 aña no a uza hopi e derecho di amienda. En total a entrega 17 amienda e ultimo 3 aña, 8 den 2017-2018, 7 den 2018-2019, y 2 den 2019-2020. Ora ta papia di mocion, ta diferente. Den e prome aña ora e parlamento actual a sinta (2017-2018), a entrega 107 mocion en total. E number aki a sigui baha anualmente, unda den 2018-2019 a entrega 32, y den 2019-2020 a entrega 26.

Mescos cu e ultimo articulo publica riba informacion parlamentario, y tocante e proceso legislativo, no tin ningun splicacion dicon parlamento como organo no tin e informacion aki disponibel facilmente pa asina publico por haci evaluacionnan critico di conducta parlamentario.